Qishloq xo’jaligi asosiy maqsadiga erishishi uchun turli xildagi mahsulotlar etishtiriladi, ishlar, xizmatlar bajariladi, ular talabni qondirish maqsadida taqsimlanadi, sotiladi. Korxonalar, birlashmalar, tarmoqlar (tuman, viloyat, respublika) miqyosida kechayotgan bu jarayonlar erkin bozor munosabatlari asosida amalga oshirilishi maqsadga muvofiqdir. Ularni nazariy va amaliy jihatdan talab darajasida hal etish uchun respublikada tub islohotlarni amalga oshirish zarur.

Ma’muriy-buyruqbozlikka asoslangan, markazdan rejali boshqarilgan iqtisodiyotdan erkin bozor iqtisodiyotiga bosqichma-bosqich o’tish sharoitida davlat ustuvorligida qishloq xo’jaligida talabga javob beradigan, samarali huquqiy, tashkiliy, iqtisodiy va ijtimoiy munosabatlar tizimi yaratilmoqda: mulkchilikning turli shakllari barpo etilmoqda, natijada erkin mulkiy munosabat vujudga kelmoqda, tadbirkorlikning har xil turlarini yaratish, ularni rivojlantirish yo’lidan borilmoqda, yer-suv islohotlari amalga oshirilmoqda; tarmoqning cheklangan ishlab chiqarish resurslari (yer-suv, kapital, mehnat, tadbirkorlik qobiliyati)dan samarali foydalanish, ishlab chiqarilgan mahsulotlarni sotish, daromad, foyda va ularning taqsimlanishi, investisiyalarni jalb etish, ulardan samarali foydalanish, tarmoq ishlab chiqarishini maqsadga muvofiq joylashtirish, ixtisoslashtirish hamda agrosanoat integrasiyasini xalqaro munosabatlar asosida tashkil etish va rivojlantirish bilan bog’liq bo’lgan iqtisodiy munosabatlar tizimi yaratilib, ular takomillashtirilmoqda, rivojlantirilmoqda.

Yuqorida ta’kidlangan iqtisodiy munosabatlar tizimini yaratishda xalqimiz hamda qishloq xo’jaligining o’ziga xos xususiyatlarini e’tiborga olgan holda tabiiy, ijtimoiy, iqtisodiy qonunlar, iqtisodiy kategoriyalar talablaridan oqilona foydalanish taqazo etiladi. Yuqoridagilarga asoslanib, qishloq xo’jaligining barqaror iqtisodiy asosini, takror ishlab chiqarish jarayoni rivojlantirilishini ta’minlaydigan iqtisodiy munosabatlar tizimini yaratish va ularni hayotga joriy etish masalalarini, yo’llarini o’rgatish «Qishloq xo’jaligi iqtisodiyoti va menejmenti» fanining ham predmeti, ham maqsadi hisoblanadi. «Qishloq xo’jaligi iqtisodiyoti va menejmenti» fani predmeti (maqsadi)ni hal etish uchun quyidagi asosiy vazifalar yechimining nazariy, uslubiy asoslarini o’rgatish lozim:

• qishloq xo’jaligining bosqichma-bosqich rivojlanishini, uning respublika iqtisodiyotidagi o’rni, ahamiyati hamda o’zgarish qonuniyatlarini aniqlashni;
• tarmoqqa davlat rahbarligini, unda amalga oshirilayotgan agrar-iqtisodiy islohotlar mazmuni va mohiyatining holatini, ularni rivojlantirish yo’llarini, masalalarini ko’rsatish;
• qishloq xo’jaligida faoliyat ko’rsatayotgan tadbirkorlik turlari, ularning faoliyatiga baho berish va takomillashtirish yo’llari;
• tarmoqning cheklangan yer-suv, mehnat resurslari, investisiyalar va ulardan tadbirkorlik bilan samarali foydalanish darajasiga iqtisodiy baho berish tartibini o’rganish, ularni takomillashtirish va rivojlantirish yo’llarini asoslab berish;
• qishloq xo’jaligida amalga oshirilayotgan doimiy va o’zgaruvchan, o’rtacha xarajatlarni, ularning tarkibi va kamaytirish yo’llarini, etishtirilgan mahsulotning hajmini, sifatini, samarali taqsimlanishini hamda pul oqimlarini o’rgatish;
• tarmoqda iqtisodiy munosabatlarni amalga oshirishda foydalanilayotgan baholarning tizimini, tarkibini, mazmunini, daromad va foydani aniqlash, ularni oqilona taqsimlash yo’llarini ko’rsatish;
• qishloq xo’jaligi ishlab chiqarishining qay darajada ixtisoslashganligini, joylashganligini hamda ichki va tashqi integrasiyalashganligini va boshqa masalalarini o’rganish zarur.

Ularni hal etishda boshqa fanlarga asoslanish maqsadga muvofiqdir.

«Qishloq xo’jaligi iqtisodiyoti va menejmenti» fani o’zining maqsad va asosiy vazifalarini hal etishda barcha iqtisodiy munosabatlarni dialektik materializm ta’limotlariga asoslanib, yemperik holda tadqiq yetadi. Amalga oshirilayotgan iqtisodiy voqyealarni induktiv hamda deduktiv usullarga asosan o’rganib, iqtisodiy mushohada qilish hamda «analiz», «sintez» usullaridan keng ko’lamda foydalaniladi. Jumladan, qishloq xo’jaligi iqtisodiyoti bilan shug’ullanuvchi iqtisodchilar iqtisodiy muammolar hal etilishini ta’minlaydigan siyosatning iqtisodiy prinsiplarini, mexanizmlarini ilmiy jihatdan asoslagan holda shakllantirib borishlari lozim. Buning uchun dastavval har bir muammoga taalluqli bo’lgan ilmiy, uslubiy, statistik ma’lumotlarni, misollarni to’plab, ularni turli usullar yordamida tahlil qilishlari, shu asosda har bir iqtisodiy prinsipga, mexanizmga ta’sir etuvchi omillarni real xo’jaliklar, tarmoqlar miqyosida aniqlashlari kerak.

Har qanday iqtisodiy prinsip va mexanizmning amal qilishini aniqlashda dastavval nazariy g’oyalarga, so’ngra ularning amal qilishiga asoslaniladi. Bu jarayon muammoni tadqiq etishning deduktiv usuli deb nomlangan. Yuqoridagi masalani tadqiq etishda, o’rganishda dastavval ma’lumotlar, voqyealar, faktlar o’rganiladi. Nazariy g’oyalarni yaratish jarayoni esa induktiv tadqiq etish usuli deb nomlangan. Demak, qishloq xo’jaligida amalga oshirilayotgan har qanday iqtisodiy muammoni avval uning nazariyasidan, ya’ni g’oyasidan amal qilishiga qarab o’rganish yoki bu muammoning amaliyotga joriy etilishidan, ya’ni amaliyotdagi holatiga asoslangan holda g’oya yoki nazariyasini yaratishga qarab tadqiqot olib borish mumkin. Ikkala holatda ham iqtisodiy prinsiplarning, mexanizmlarning, muammolarning yechimi samarali aniqlanishi kerak. Iqtisodchilar o’z g’oyalariga, taxminlariga, ayrim voqyealarga, ma’lumotlarga asoslangan holda yaratgan yoki shakllantirgan g’oyalarini, taxminlarini gipoteza, ya’ni asoslanmagan g’oya, deb atashadi. Ilmiy yoki amaliy gipotezalar induktiv va deduktiv tadqiqot usullari yordamida shakllantirilishi mumkin. Yuqorida ta’kidlangan tadqiq qilish, o’rganish usullari qo’llangan holda yaratilgan, shakllantirilgan prinsiplar, mexanizmlardan foydalanib, u yoki bu muammoni hal etishning iqtisodiy siyosati, strategiyasi belgilanadi. Yaratilgan iqtisodiy siyosatni joriy etish mexanizmlari va ularni amalga oshirish usullarini iqtisodchilar mukammal o’rganishlari lozim. Masalan, respublika qishloq xo’jaligida mulkning turli shakllarini barpo etish g’oyasi bozor iqtisodiyoti rivojlangan davlatlardagi nazariy g’oyalarga va ularning amaliyotda hal etilishiga asoslangan. Muammoni tarmoqda hal etishda respublika qishloq xo’jaligi amaliyotidagi holatlar, misollar, ma’lumotlar asos qilib olinib, bu jarayon tobora rivojantirilmoqda va chuqurlashtirilmoqda.

Demak, iqtisodchi mutaxassislar qishloq xo’jaligida erkin bozor munosabatlarini shakllantirish g’oyalarini yaratib, ularni amaliyotga tatbiq etish mexanizmlarini mukammal bilishlari zarur. «Qishloq xo’jaligi iqtisodiyoti» fanining maqsad va vazifalarini tadqiq qilishda iqtisodiy- matematik usullar tizimidan, elektron-hisoblash mashinalaridan, kompyuter texnikalardan keng ko’lamda foydalanish maqsadga muvofiqdir. Fanning maqsad va vazifalarini hal etish masalalari statistik, normativ hamda xo’jalik ma’lumotlariga asoslanib, yuqoridagi usullar yordamida tadqiq etiladi.

«Qishloq xo’jaligi iqtisodiyoti va menejmenti» fani tarmoqda amalga oshirilayotgan tashkiliy, iqtisodiy, ijtimoiy munosabatlar majmuasining nazariy asoslarini, yo’nalishlarini, samaradorligini mavjud tadqiqot usullari yordamida o’rgatish orqali talabalarda tarmoq iqtisodiyoti bo’yicha iqtisodiy mushohada qilish, uni rivojlantirishga oid muammolarni qo’yish, hal etish, samaradorligini oshirish, yo’nalishlarini belgilab berish qobiliyatini shakllantirib, bozor iqtisodi talablariga javob bera oladigan agrar-iqtisodchilar tayyorlashga ko’maklashadi.

Iqtisodiy fan, kamyob resurslarni taqsimlashning muqobil yollarini organuvchi fandir. Mantiqiy togri xulosalar chiqarish va qarorlar qabul qilish uchun har bir nazariya va modelni, iqtisodiy qonunlarni shu sohaning oziga xos xususiyatlarini hisobga olgan holda qo'llash taqozo qilinadi. ««Qishloq xo’jaligi iqtisodiyoti va menejmenti» fani ham bundan mustasno emas.

«Qishloq xo’jaligi iqtisodiyoti va menejmenti» fani iqtisodiy fan bo'lib, ayrim olingan korxonalarda iqtisodiy qonunlar, nazariyalar, modellar harakati mexanizmining oziga xos xususiyatlarini, ulardan foydalangan holda korxonalar faoliyatini maqsadga muvofiq tashkil qilish, rejalashtirish va boshqarish yollarini o'rgatadi.

«Qishloq xo'jaligi korxonalari faoliyatini boshqarish» fani boshqa iqtisodiy fanlar singari cheklangan resurslar sharoitida moddiy ne’matlar ishlab chiqarish, taqsimlash va iste’mol qilish jarayonida insonlarning hatti-harakatini tadqiq etadi.